Flughálka og skafrenningur á vesturlandi

Flughálka er nú á Vesturlandi og skafrenningur bæði á Holtavörðuheiði og í Bröttubrekku. Á Suðurlandi eru hálkublettir og éljagangur á flestum leiðum og hálka á Hellisheiði.

Á Vestfjörðum er sumsstaðar krap, snjóþekja, hálka og hálkublettir á fjallvegum og sumstaðar éljagangur og skafrenningur. Snjóþekja og éljagangur er á Steingrímsfjarðarheiði en hálka og éljagangur á Þröskuldum. Hálkublettir og éljagangur er norður í Árneshrepp á Ströndum.

Vegir eru mikið til auðir á Norðurlandi þó eru hálkublettir í Húnavatnssýslum. Hálka á Þverárfjalli. Þæfingsfærð og skafrenningur er á Öxnadalsheiði. Krapi er á Dettifossvegi en hálkublettir á Hólasandi.

Hálkublettir eru á Mývatnsöræfum og á  Vopnafjarðarheiði en hálka á Mörðudalsöræfum.

Á Austurlandi eru vegir orðnir greiðfærir sem með suðausturströndinni.

Veðurfræðingur Vegagerðarinnar bendir á að í nótt kólnar og víða mun frysta, einnig á láglendi, a.m.k. staðbundið, með ísingarmyndun.

• Blogga um frétt