Um 200 manns frá 33 starfseiningum allra 10 sviða Landspítalans taka þátt í undirbúningi þess hvernig bregðast á við ef sjúklingur með ebólu kemur til landsins. Þetta kemur fram á vef spítalans.

Á Landspítala er nú verið að þjálfa stóra hópa starfsmanna í notkun hlífðarbúnaðar vegna ebólu.

Í gær var 35 manna viðbragðsteymi þjálfað sérstaklega af starfsmönnun sýkingavarnadeildar ásamt Mögnu B. Ólafsdóttur hjúkrunarfræðingi.  Magna, sem er starfsmaður Rauða krossins á Íslandi, vinnur í Genf við að þjálfa alþjóðlega viðbragðsliða í ebóluvörnum og er hingað komin á vegum Rauða krossins á Íslandi til að taka þátt í þjálfun heilbrigðisstarfólks hér á landi. Hennar starf er framlag Rauða krossins til ebóluviðbúnaðar á Íslandi.