Fundur stendur nú yfir í kjaradeilu starfsmanna álvers Rio Tinto Alcan í Straumsvík í húsnæði ríkissáttasemjara en boðað verkfall hefst á miðnætti náist ekki að semja. Fundurinn hófst klukkan 18 að því segir í kvöldfréttum RÚV og Stöðvar 2.
Samkomulag álversins og starfsmanna kveður á um að starfsmenn mæti til vinnu í tvær vikur eftir að verkfallið skellur á til þess að slökkva á 480 kerum álversins. Í samtali við mbl.is í dag sagði Ólafur Teitur Guðnason, upplýsingafulltrúi Rio Tinto á Íslandi, að ef til verkfalls kæmi yrði byrjað að slökkva á kerjunum á morgun.