Framkvæmdir sem standa yfir við Jökulsárlón hafa vakið þó nokkra athygli en í vefmyndavél Mílu má fylgjast með stórri gröfu hella jarðvegi út í lónið.
Samkvæmt upplýsingum mbl.is er um að ræða viðhaldsframkvæmdir á vegum Vegagerðarinnar en unnið er að því að styrkja grjótvörn sem er undir vatnsborðinu í Jökulsá.
Að sögn Björns Inga Jónssonar, bæjarstjóra Hornafjarðar, kemur grjótvörnin í veg fyrir að stórir ísjakar geti runnið niður ána og á brúna og valdið þannig skemmdum á brúnni.
Framkvæmdirnar hófust í síðustu viku, en verkið er unnið á tveggja til þriggja ára fresti, þegar grjótvörnin er farin að láta á sjá.
Hér má fylgjast með Jökulsárlóni úr vefmyndavél Mílu