Brotist hefur verið inn í fjölda bíla á Seltjarnarnesi undanfarna daga. Skráð tilvik hjá lögreglunni á höfuðborgarsvæðinu síðustu tvo daga eru fimm talsins en samkvæmt heimildum mbl.is hefur verið brotist inn í sextán bíla. Stýri og hluta af mælaborði var einnig stolið úr BMW-bifreið á Seltjarnarnesi fyrr í mánuðinum.
Rafn Hilmar Guðmundsson, aðalvarðstjóri hjá lögreglunni, segir að af þeim fimm bifreiðum sem farið var inn í hafi þrjár verið ólæstar.
Spurður út í BMW-bifreiðina segist hann ekki kannast við að slíkt tilvik hafi áður komið upp. Aftur á móti séu sams konar afbrot þekkt erlendis í tengslum við sömu tegund af BMW-bifreiðum.
Rafn Hilmar hefur ekkert heyrt af því að verið sé að stela varahlutum úr bílum hér á landi en alltaf séu að koma upp mál vegna þjófnaðar á dekkjum, ljóskösturum eða öðrum slíkum hlutum.
Hann telur ólíklegt að sá sem braust inn í bílana fimm hafi einnig stolið stýrinu og hluta af mælaborði BMW-bifreiðarinnar.
Að sögn Rafns Hilmars hefur verið mikið um innbrot á höfuðborgarsvæðinu að undanförnu. Brotist hefur verið inn í bíla, auk þess sem töluvert hefur verið um innbrot í fyrirtæki á svæði 105 og 108.