Nokkur fjöldi fólks hefur beðið í nótt fyrir utan verslunina Húrra Reykjavík á Hverfisgötu þar sem nýjasta skólína tónlistarmannsins Kanye West fer í sölu í dag. Strangar reglur virðast gilda um söluna en Húrra segist hafa skýr fyrirmæli frá Adidas Global um að gefa ekki upp hversu mörg pör verslunin hefur fengið.
Skólínan heitir YEEZY BOOST 350 V2. Húrra opnar kl. 10 en viðskiptavinum, sem sumir hafa beðið að minnsta kosti frá klukkan 1, þegar þessar myndir voru teknar, verður hleypt inn í 10 manna hópum. Ekki verður í boði að máta skóna, að því er fram kemur á Facebook-síðu Húrra.
Skórnir kosta 29.900 krónur í fullorðinsstærðum og 21.990 í barnastærðum.