Maður sem stal bifreið í Kópavogi upp úr klukkan 23 í gærkvöldi var fljótlega handtekinn á skemmtistað í Hafnarfirði en bifreiðinni hafði verið lagt þar fyrir utan. Maðurinn var bæði undir áhrifum fíkniefna og áfengis auk þess að vera sviptur ökuréttindum. Bifreiðin er óskemmd eftir ferðalagið á milli sveitarfélaganna.
Um svipað leyti var tilkynnt um innbrot í bifreið í Austurbæ Reykjavíkur og einhver verðmæti tekin úr henni. Í morgun var tilkynnt um innbrot í bifreið í Grafarvogi en ekki kemur fram í dagbók lögreglunnar hvort einhverju var stolið.
Á níunda tímanum í gærkvöldi var tilkynnt um innbrot í hús í Garðabæ sem er í byggingu og þaðan stolið verkfærum.