Það eru stór skref fyrir foreldra að setja ung börn í leikskóla. Við upphaf leikskólagöngu er lagður grunnur að samstarfi foreldra og leikskóla. Góð aðlögun foreldra og barna í leikskóla skiptir miklu máli fyrir alla. Leikskólinn Akrar hefur lagt áherslu á þátttökuaðlögun með góðum árangri. Aðlögunin tekur þrjá daga. Á fjórða degi kveðja flest börnin foreldra sína tilbúin og örugg í leikskólann.
Sigrún Sigurðardóttir leikskólastjóri og Harpa Kristjánsdóttir deildarstjóri ræddu við blaðamann Morgunblaðsins um mikilvægi þátttökuaðlögunnar.
Aðlögun barna í leikskólum hefur verið með misjöfnum hætti. Sú aðferð sem Akrar í Garðabæ nota hefur gengið mjög vel að sögn Hörpu. Hún segir að aðlögunin felist í því að foreldri eða foreldrar komi fyrst með börnum sínum hálfan daginn en viðveran lengist svo næstu tvo daga. Á fjórða degi er aðlöguninni lokið og undantekningarlítið gengur vel þegar barnið er skilið eftir án foreldra á fjórða degi. „Á meðan á aðlögun stendur taka foreldrarnir þátt í starfinu og börnin verða fyrr öruggari í þessu nýja umhverfi,“ segir Harpa.
Að sögn Sigrúnar leikskólastjóra er meginmarkið þátttökuaðlögunar að auka öryggi foreldra í leikskólanum. „Ef foreldrarnir eru öruggir verða börnin það líka. Foreldrar fá að kynnast starfsemi skólans og fá tilfinningu fyrir því hvernig dagurinn á deild barnsins gengur fyrir sig. Við þessa aðlögun myndast góð kynni milli starfsmanna og foreldra sem byggja grunn að góðu samstarfi til framtíðar,“ segir Sigrún og bætir við að börnin nái að aðlagast vel á þessum þremur dögum.
Sigrún var með 15 ára reynslu sem leikskólastjóri í Reykjavík þegar hún tók við leikskólanum Akri í Garðabæ. Hún segir að strax í upphafi starfs Akra hafi verið lögð áhersla á þátttökuaðlögun foreldra og barna. Sigrún segir að ekki sé hægt að líkja þessari aðferð saman við það sem áður var gert. „Við náum miklu meiri tengingu við foreldrana sem koma á kaffistofuna og fá sér kaffi með okkur. Það er ekkert sem heitir við og þið. Allir eru í sama liði. Líka við sem erum að gæta gimsteina foreldranna.“ Harpa og Sigrún eru sammála um að hugmyndin að þátttökuaðlöguninni hafi þróast á leikskólum. Ekki sé hægt að setja eitthvert eitt nafn eða merkingu á þátttökuaðlögun. „Í starfi leikskólakennara fer einhver góð hugmynd af stað og hún þróast í takt við þarfirnar,“ segir Sigrún. Þær Harpa segja þátttökuaðlögunina gott hópefli sem skili dýpra sambandi milli foreldra, barna og starfsfólks. Þær eru ánægðar með þá þróun sem átt hefur sér stað að báðir foreldrar komi í ríkari mæli að aðlögun barna í leikskóla. Þær nefna sem dæmi að morguninn sem viðtalið var tekið hafi þrjú ný börn verið á einni deild í aðlögun og það séu feðurnir sem hafi mætt með þeim börnum. Aðspurðar segjast Harpa og Sigrún ekki hafa orðið varar við að foreldrar eigi í erfiðleikum með að komast frá vinnu vegna þátttökuaðlögunar.