Rannsókn lögreglu á morðinu á Sanitu Braune, 44 ára gamalli konu frá Lettlandi, lauk í síðustu viku. Grímur Grímsson yfirlögregluþjónn segir að héraðssaksóknari taki ákvörðun um það fljótlega hvort ákæra verði gefin út í málinu.
Sanita var myrt á Hagamel í Vesturbæ Reykjavíkur 21. september og hefur maðurinn, sem grunaður er um að hafa orðið Braune að bana, setið í gæsluvarðhaldi síðan þá og er enn í haldi.
„Rannsókn lauk í síðustu viku og var send til héraðssaksóknara sem á eftir að taka ákvörðun um hvort gefin verði út ákæra í málinu eða ekki,“ segir Grímur.
Atburðarásin liggur fyrir að mestu leyti. Hinn grunaði hefur játað að hafa slegið til Sanitu og veitt henni höfuðhögg með slökkvitæki.