Guðlaugur Þór Þórðarson, alþingismaður og oddviti Sjálfstæðisflokksins í Reykjavíkurkjördæmi norður, segist vera hóflega bjartsýnn fyrir niðurstöðu kosninganna, en hann er nú staddur er á kosningavöku Sjálfstæðisflokksins á Grand hótel.
„Mér líður vel,“ segir Guðlaugur. „Þetta er búin að vera gríðarlega mikil barátta. Það sem stendur upp úr hjá okkur er þessi mikli kraftur í grasrótinni í Reykjavík, sem náði hámarki í dag,“ bætir hann við. „Kosningakaffið í dag var þannig að það hefur ekki sést meira ef það er eitthvert merki.“
Guðlaugur segir baráttuna hafa verið ánægjulega, en þó hafi á ýmsu gengið. „Það verður fróðlegt að sjá niðurstöðurnar. Það er nýtt fyrir okkur Sjálfstæðismenn að vera með fyrrverandi formann og varaformann flokksins í framboði sem er að mestu leyti beint gegn Sjálfstæðisflokknum í Reykjavík,“ segir hann. „Þannig það er auðvitað nýtt svona ofan á það að takast á við þessa hefðbundnu flokka.“
Loks segist hann hóflega bjartsýnn. „En þetta kemur allt saman í ljós.“