Matur | Veitingastaðir | mbl | 7.3.2024 | 18:00

Óskar er búinn að draga fram Argentínu-steikargrillið fyrir Cook

Finnsson Bistro teymið tilbúið í slaginn með Tom Cook, Bjarki Björnsson, Klara Óskarsdóttir, Óskar Finnsson, Tom Cook, Reynir Guðjónsson og Hammadi.b Hamadi. mbl.is/Kristinn Magnússon

lmurinn er svo lokkandi á Finnsson Bistro þessa dagana og minnir óneitanlega á ilminn frá Argentínu steikhúsi sem lá í loftinu á Barónsstíg í forðum. Það er ekki skrýtið að þessi ilmur, sem er algjör nostalgía, streymi frá Finnsson Bistro núna þar sem gestakokkurinn, Tom Cook, er í eldhúsinu, er að steikja hágæða steikur á gamla góða Argentínusteikargrillinu ásamt Finnsson teyminu. Í tilefni matarhátíðarinnar er Cook gestakokkur á Finnsson og matseðilinn er sérhannaður fyrir matgæðinga sem elska góðar og safaríkar steikur. Hér eru á ferðinni sérvaldar steikur sem steikarunnendur munum hreinlega slefa yfir ef svo má að orði komast.

Tom Cook sérhæfir sig í framúrskarandi matreiðslu á úrvals steikum og hér er sýnishorn af því sem koma skal. Ribeye steikinn frá U.S.A. íslenska Ribeye steikin og sú spænska. mbl.is/Kristinn Magnússon

Tileinkaði sér rólegan leiðtogastíl

Vegferð Cook hófst undir leiðslu hins virta matreiðslumanns Gary Rhodes, sem leiddi fljótlega af sér Michelin stjörnu á veitingastaðnum City Rhodes. Hann fínstillti síðan hæfileika sína hjá Le Gavroche og The Capital Hotel, þar sem hann tileinkaði sér rólegan leiðtogastíl Michel Roux Jr. Leið hans lá í kjölfarið til Parísar þar sem hann bætti sérstaklega við þekkingu sína í eftirréttum. Eftir París hélt Cook til Sydney þar sem hann tók stöðu „sous chef“ á veitingastaðnum Pier.

Heillar með framúrskarandi matreiðslu á steikum

Þegar Cook sneri aftur til London, tók hann við keflinu á veitingastaðnum Tom Aikens og síðar Le Pont de la Tour, þar sem hann setti á fót einstaklega vinsæl matreiðslunámskeið. Sem yfirkokkur á Skylon, og nú síðast Smith & Wollensky, heldur Cook áfram að heilla með framúrskarandi matreiðslu á úrvals steikum og áherslu á frábæra þjónustu.

Food & Fun matseðillinn á Finnsson lítur svona út:

Wagyu carpaccio með seljurótar-wasabikremi, klettasalati og parmesanosti.
Túnfisk tartar bornir fram með avókadó, radísum, ponzu, hvítlauksmajó og lótusrótar-flögum.
250 g ribeye steik frá Íslandi, borin fram með rósmarín smælki, Wollensky-salati, pipar- eða bernaisesósu.
S´More Fondue, amerískur súkkulaðiunaður með sykurpúða, jarðarberjum og sérbökuðu kexi.
Síðan fyrir þá sem vilja meira og meira er hægt að fá Creekstone 350 g, Black Angus Ribeye frá U.S.A og/eða Miguel Vergara 350 g, Ribeye frá Spáni.