Segir stærð og lögun brjóstanna á konum gefa vísbendingu um persónuleikann

Ítalskur kynlífsfræðingur kveðst geta sagt til um persónuleika kvenna út frá stærð og lögun brjóstanna á þeim. „Brjóst kvenna gefa vísbendingu um persónuleika þeirra, rétt eins og stjörnumerkin,“ hefur þýska blaðið Bild eftir kynlífsfræðingnum, Piero Lorenzoni.

Hann hefur flokkað brjóst eftir því hvaða ávöxtum þau líkjast, og í frétt Ananovu um málið segir að flokkunin byrji „á hinni hefðbundnu melónu“.

Haft er eftir Lorenzoni að konur með stór, ávöl brjóst sem líkist melónum hafi alls ekki móðurlegar tilfinningar, þótt einhverjir kynnu að ætla það. Slíkum konum þyki gott að borða og vilji láta dekra við sig og dást að sér. „En þær hafa lítinn áhuga á kynlífi,“ segir hann.

Konur með „sítrónur“ eru „einkar lífsglaðar og hafa húmor fyrir sjálfum sér. Þær vilja jafnvægi í lífinu og engar óvæntar uppákomur“.

Konur með brjóst sem Lorenzoni líkir við ananas eru „greindar, leggja oft áherslu á starfsframa en eru líka rómantískar. Þær eru ekki ótrúar. „Sá maður sem vinnur ást slíkrar konu mun seint glata henni.“

Brjóst sem líkjast greipaldinum eru heldur ekki góðs viti hvað kynlíf varðar, segir Lorenzoni. Slíkar konur „kunna að virðast til í tuskið, en í raun og veru eru þær feimnar og heimakærar. Þær daðra við mennina sína, en kjósa blíðuhót fremur en kynlíf“.

Konur með „appelsínur“ eru ekki heldur mjög áhugasamar um kynlíf. „Hún er sjálfsörugg og veit hvað hún vill, en hefur ekki mikinn áhuga á kynlífi. Hún kýs fremur samræður og félagsskap.“

Konur með lítil brjóst eru „skemmtilegar og spennandi ... greindar og góðir förunautar, bæði dags daglega og á ferðalögum, og hafa miðlungi mikinn áhuga á kynlífi“.

Konur með „perulaga“ brjóst „elska ástina í öllum sínum myndum“, segir Lorenzoni. Þær séu oft trúaðar, en viðbúið sé að þær haldi framhjá.

• Blogga um frétt