Þór/KA hefur komist að samkomulagi við Íslandsmeistara Vals um að fá Bryndísi Eiríksdóttur að láni út tímabilið.
Bryndís, sem er 18 ára gömul, lék á láni hjá HK í 1. deild á síðasta tímabili og var í stóru hlutverki; lék alla 18 leiki liðsins.
Áður hafði hún leikið 28 leiki fyrir venslafélag Vals, KH, og skorað í þeim 11 mörk í 2. deild.
Bryndís er hluti af mikilli knattspyrnufjölskyldu þar sem þrjár eldri systur Bryndísar, þær Málfríður Anna, Hlín og Arna eru allar knattspyrnukonur.
Málfríður Anna leikur með B93 í Danmörku, Hlín með Kristianstad í Svíþjóð og Arna með FH.
Hlín hefur leikið 36 A-landsleiki og skorað í þeim fimm mörk auk þess sem Arna á tvo A-landsleiki.