Fylkir hafnar í áttunda sæti Bestu deildar kvenna í knattspyrnu á komandi keppnistímabili, samkvæmt spá Morgunblaðsins og mbl.is.
Fylkir fékk 47 stig þegar atkvæði spámannanna voru lögð saman en þar voru gefin stig frá einu (fyrir 10. sætið) upp í tíu (fyrir fyrsta sætið). Einu meira en Tindastóll og fimm meira en Keflavík sem enduðu í níunda og tíunda sæti í spánni þannig að samkvæmt henni verður fallbarátta liðanna þriggja mjög hörð.
Fylkir hafnaði í öðru sæti 1. deildar í fyrra og tryggði sér Bestudeildarsætið eftir gríðarlega harða keppni við HK og Gróttu en Fylkir vann Gróttu, 3:2, í hreinum úrslitaleik liðanna í lokaumferðinni. Þar með er Árbæjarliðið aftur komið í efstu deild eftir tveggja ára fjarveru en þar lék það síðast árið 2021. Besta árangri sínum í deildinni náði Fylkir árið 2020 en þá endaði Árbæjarliðið í þriðja sæti.
Lið Fylkis er ekki mikið breytt frá því í fyrra en hefur þó fengið fjóra leikmenn til að styrkja það fyrir baráttuna meðal þeirra bestu. Abigail Boyan er miðjumaður með reynslu úr dönsku úrvalsdeildinni og Kayla Bruster er varnarmaður sem sat á bekknum hjá San Diego Waves í bandarísku atvinnudeildinni en fékk ekki tækifæri til að spila.
Þjálfarinn Gunnar Magnús Jónsson er sitt annað tímabil með lið Fylkis.
Komnar:
9.3. Abigail Boyan frá AaB (Danmörku)
27.2. Kayla Bruster frá San Diego Waves (Bandaríkjunum)
1.2. Amelía Rún Fjeldsted frá Keflavík
1.2. Emma Sól Aradóttir frá HK (lán)
Farnar:
12.4. Birna Kristín Eiríksdóttir í Fram (lán)
Fyrstu leikir Fylkis:
22.4. Fylkir - Þróttur R.
27.4. Víkingur R. - Fylkir
2.5. Fylkir - Keflavík
9.5. Tindastóll - Fylkir
15.5. Fylkir - Breiðablik
Lokastaðan:
1 ??
2 ??
3 ??
4 ??
5 ??
6 ??
7 ??
8 Fylkir 47
9 Tindastóll 46
10 Keflavík 42