Eggert Gunnþór Jónsson var valinn maður leiksins í kvöld þegar Fleetwood sigraði Millwall, 2:1, í ensku C-deildinni í knattspyrnu en eins og áður kom fram skoraði Eggert fyrra mark liðsins í þessum mikilvæga sigri og jafnframt sitt fyrsta fyrir félagið.
Fleetwood vann annan leik sinn í röð, eftir að hafa verið næstneðst í deildinni fyrir síðustu helgi, en nú er liðið í 17. sæti af 24 liðum og tveimur stigum fyrir ofan fallsæti.
„Sigurinn var aðalatriðið því nú höfum við náð að vinna tvo leiki í röð og þetta er frábær kafli hjá okkur. Við höfum bætt okkur verulega sem lið, og í kvöld spiluðum við virkilega vel í fyrri hálfleik en vorum óheppnir að vera ekki að minnsta kosti tveimur mörkum yfir. Þetta var meiri barningur í seinni hálfleik en þá sýndum við aðra hlið á okkur," sagði Eggert við vef Fleetwood.
„Markið var reyndar afar einfalt og það hefði verið erfiðara að brenna af en að skora, en þetta gerðist snöggt og ég rak bara hausinn í boltann," sagði Eskfirðingurinn um markið en hann kom Fleetwood yfir um miðjan síðari hálfleik.
Fleetwood mætir Blackpool í grannaslag um næstu helgi en Blackpool er fimm stigum neðar í næstneðsta sæti deildarinnar.
Markið hans Eggerts má sjá í meðfylgjandi myndskeiði.
Here is @EggertJonsson4 goal from tonight for @ftfc. #TeamTotalFootball #CodArmy pic.twitter.com/k5o0bsZtE4
— Total Football (@totalfl) November 24, 2015