Manchester United er skrefi nær því að krækja í Henrikh Mkhitaryan, leikmann Borussia Dortmund, eftir að félögin komust að samkomulagi um kaupverð í morgun.
United mun borga rúmlega 26 milljónir punda fyrir hinn 27 ára gamla miðjumann sem kemur frá Armeníu. Hann hefur þegar samið um kaup og kjör við United og á nú eftir að undirgangast læknisskoðun áður en kaupin ganga í gegn.
Mkhitaryan er fyrirliði armenska landsliðsins og kom til Dortmund frá Shakhtar Donetsk í Úkraínu fyrir þremur árum. Hann átti frábært tímabil með Dortmund síðasta vetur, skoraði 18 mörk og lagði upp önnur 25. Hann var að lokum valinn leikmaður ársins í þýsku 1. deildinni.