Lið Bandaríkjanna og Sviss sem eru með Íslandi í riðli í Algarve-bikarnum mættust í fyrri leik B-riðils dag og fóru þær bandarísku með frábæran sigur af hólmi 3:0 og eru nú með fullt hús stiga eftir tvo leiki.
Markalaust var í fyrri hálfleik en Alex Morgan kom liðinu yfir á 54. mínútu eftir stoðsendingu frá Lauren Holiday.
Amy Rodriguez tvöfaldaði forystu liðsins á 72. mínútu eftir klafs í vítateig Svisslendinga en varamaðurinn Abby Wambach sem hafði aðeins verið inni á vellinum í eina mínútu kórónaði svo sigur Bandaríkjanna með frábæru marki og góðri afgreiðslu þegar hún vippaði boltanum yfir markvörð Svisslendinga, 3:0 lokatölur.
Bandaríkin fara með sigrinum í sex stig og eru komin í góða stöðu fyrir lokaleik liðsins gegn Íslandi á mánudag. Sviss hefur þrjú stig í 2. sæti.
Norðmenn og Íslendingar eigast við í hinum leik riðilsins, þar er staðan 1:0 fyrir Noregi þegar þetta er skrifað.
It's 1-0! @alexmorgan13 celebrates her @Algarve_Cup2015 goal early in the second half! #USAvSUI pic.twitter.com/NmGKVnggKG
— U.S. Soccer WNT (@ussoccer_wnt) March 6, 2015