Viðar Örn Kjartansson, leikmaður Malmö í Svíþjóð, gerði þrennu fyrir liðið í 4:1 sigri á Östersund í sænsku úrvalsdeildinni í knattspyrnu í dag.
Framherjinn knái hefur verið magnaður í síðustu leikjum en hann er kominn með átta mörk í ellefu deildarleikjum.
Hann gerði þrennu fyrir Malmö gegn nýliðum Östersund í dag en hann lék allan leikinn. Þriðja markið kom í uppbótartíma. Kári Árnason lék þá allan leikinn fyrir Malmö.
Haraldur Björnsson var allan tímann á varamannabekk Östersund.
Malmö er í efsta sæti deildarinnar með 27 stig en Östersund er í 11. sæti með 15 stig.