Caroline Rotich frá Keníu vann keppni kvenna í Boston-maraþoninu í dag eftir hreint ótrúlega harða keppni við Mare Dibaba frá Eþíópíu.
Rotich kom í mark fjórum sekúndum á undan Dibaba eftir æsispennandi lokasprett niður Boylston Street. Sigurtími hennar var 2:24,55 klukkustundir.
Lelisa Desisa vann keppni karla, rétt eins og árið 2013. Þá gat hann lítið fagnað enda sprungu tvær sprengjur nálægt endamarkinu sem urðu þremur áhorfendum að bana og slösuðu 260 til viðbótar. Desisa gaf verðlaun sín til Boston-borgar til minningar um fórnarlömbin, en verðlaunin sem hann fékk í ár ætlar hann að eiga sjálfur.
„Ég held að þessi verðlaunapeningur sé ætlaður mér,“ sagði Desisa eftir hlaupið.