Körfuknattleiksmaðurinn Stephen Curry leiðir lista SportsPro yfir 50 markaðsvænstu íþróttamenn heims. Listinn er gefinn út árlega og er byggður á einkar athyglisverðum forsendum.
Markmið listans er ekki að finna út hvaða íþróttamenn eru með dýrustu auglýsingasamningana, heldur hverjir gefi í raun mest fyrir peninginn. Litið er sérstaklega til íþróttakappa á uppsiglingu, sem ódýrt er að gera samning við, og líklegt er að springi út á næstu 3 árum. Í ljósi þessara röksemda kemur ekki á óvart að Curry skipi efsta sæti listans, enda skaust hann mjög skyndilega í fremstu röð körfuknattleiksmanna.
Það þýðir ekki að engar stórstjörnur séu á listanum. Cristiano Ronaldo og Lionel Messi skipa 35. og 27. sæti listans, en athyglisvert er að Pierre-Emerick Aubameyang, leikmaður Borussia Dortmund, er í 25. sæti. Frakkinn Paul Pogba er markaðsvænsti knattspyrnumaður heims samkvæmt SportsPro, en hann er í öðru sæti á listanum. Sá knattspyrnumaður sem kemst næst honum er Neymar Jr., leikmaður Barcelona, sem er í 8. sæti.
Ýmsir athyglisverðir íþróttamenn eru á listanum. Delle Alli, leikmaður Tottenham, er til dæmis í 45. sæti. Listann má sjá í heild sinni hér.
Einnig verða taldir upp tíu efstu íþróttamenn listans.
10. Mikaela Shiffrin - Skíði
9. Missy Franklin - Sund
8. Neymar - Fótbolti
7. Lydia Ko - Golf
6. Kei Nishinori - Tennis
5. Anthony Joshua - Box
4. Jordan Spieth - Golf
3. Virat Kohli - Krikket
2. Paul Pogba - Fótbolti
1. Stephen Curry - Körfubolti