Darren Clarke, fyrirliði Evrópuliðsins í Ryder-keppninni, hefur skipað þá Padraig Harrington, Paul Lawrie og Thomas Bjørn sem varafyrirliða liðsins. Clarke mun svo skipa tvo varafyrirliða í viðbót og verður tilkynnt hverjir það muni vera innan tíðar.
Harrington hefur mestu reynsluna í Ryder-keppninni af varafyrirliðunum þremur, en hann hefur verið í sigurliði Evrópuliðsins í fjórum af þeim sex keppnum þar sem hann hefur tekið þátt.
Bjørn hefur hins vegar borið sigur úr býtum í öll þrjú skiptin sem hann hefur leikið með Evrópuliðinu í keppninni.
Lawrie var í Evrópuliðinu sem tapaði á afar svekkjandi hátt í Brookline í Massachusetts í Bandaríkjunum árið 1999 og var síðan hluti af Evrópuliðinu sem vann ótrúlegan sigur í keppninni í Medinah í Bandaríkjunum árið 2012.
Clarke telur að varafyrirliðarnir muni leika stórt hlutverk þegar Evrópuliðið freistar þess að vinna Ryder-keppnina fjórða árið í röð, en Evrópuliðinu hefur ekki tekist það áður.