Í gær staðfestu NFL og NBC að Katy Perry myndi sjá um að halda uppi fjörinu í hálfleik á 49. Ofurskálinni (e. Super Bowl) þann 1. febrúar 2015.
Á síðasta ári horfðu 111,5 milljónir manna á Ofurskálina, sem er úrslitaleikur NFL-deildarinnar í amerískum fótbolta, en hvorki fyrr né síðar hefur nokkur sjónvarpsviðburður dregið að sér viðlíka áhorf.
Í gær tísti Perry að hún væri þegar byrjuð að prófa sig áfram með hugmyndir fyrir sýninguna og styrktaraðili hálfleikssýningarinnar, Pepsi, birti myndband sem gefur smjörþefinn af því sem koma skal.
Líklega er ekki mikið að marka myndbandið en af því að dæma mega áhorfendur búast við eldspúandi hákörlum, ætu glimmeri og þúsund kettlingum.