Segir kynhneigð sína fljótandi

Hin sjötuga Susan Sarandon lýsti því yfir í nýju viðtali að hún væri opin fyrir því að eiga í sambandi við konur. Þá sagðist hún einnig hafa átt í sambandi við samkynhneigðan mann á sínum yngri árum.

„Já ég er opin. Það mætti segja að kynhneigð mín sé opin fyrir öllu,“ sagði leikkonan í viðtali við Pride Source aðspurð að því hvort kynhneigð hennar væri fljótandi.

 „Ég átti einu sinni í farsælu, ástríku og yndislegu sambandi við mann sem ekki átti í sambandi við fleiri konur eftir mig, og það gekk ákaflega vel. Þá þurfti maður ekki að skilgreina kynhneigð sína út í þaula eins og gerð er krafa um í dag.“

Leikkonan sagðist þó ekki hafa farið á mörg stefnumót í gegnum tíðina, enda lýsir hún sér sem raðeinkvænismanneskju.

„Ég hef ekki fengið mörg tilboð af nokkru tagi, en að mínu mati var þetta allt miklu opnara á sjöunda áratugnum.“

Frétt mbl.is: Íhugar að leikstýra klámmynd

• Blogga um frétt