Bandaríkjaþing kaus með miklum meirihluta í dag að ógilda neitun Barack Obama, forseta Bandaríkjanna, á lög sem eiga að koma í veg fyrir að ríki njóti friðhelgi í þeim tilfellum þar sem þau eru ábyrg fyrir hryðjuverkaárásum sem leiða til dauða bandarískra ríkisborgara á bandarískri grund. Hefur frumvarpið meðal annars hamlað því að ættingjar fórnarlamba árásarinnar 9. september 2001 geti farið í mál við Sádí-Arabíu sem tengd hafa verið við hryðjuverkin.
Þetta er í fyrsta skipti á átta ára ferli Obama sem þessi staða kemur upp. Öldungadeildin hafði áður kosið með ógildingu neitunarinnar með 97 atkvæðum á móti 1 og stuttu seinna kaus fulltrúadeildin um málið og var niðurstaðan 348 á móti 77 atkvæðum.
Obama hafði talað mikið fyrir því að neitun hans á að samþykkja lögin yrði ekki ógild og sagði hann niðurstöðuna vera hættulega þróun. Sagðist hann skilja af hverju atkvæðagreiðslan fór á þennan hátt þar sem fólk bæri enn ör frá árásunum fyrir 15 árum. Aftur á móti myndi löggjöfin skemma fyrir Bandaríkjunum á alþjóðavettvangi og eyðileggja grundvallaratriði um friðhelgi ríkja. Þá sagði hann þetta einnig opna á að íbúar annarra ríkja gætu farið í mál við Bandaríkin út af hernaði þeirra erlendis.
Frétt mbl.is: Hóta að selja allar bandarískar eignir