Útleiga fjölda íbúða í miðborg Reykjavíkur til ferðamanna á þátt í takmörkuðu framboði lítilla íbúða á svæðinu og hefur haft í för með sér að fasteigna- og leiguverð íbúða í miðborginni hefur hækkað.
Þetta er mat Ingibjargar Þórðardóttur, formanns Félags fasteignasala, sem telur að þessar hækkanir muni smita yfir í nálæg hverfi, eins og Norðurmýri og Hlíðahverfið. Sú þróun sé þegar hafin.
„Eftir því sem ferðamönnum fjölgar getum við farið að líta til höfuðborga á Norðurlöndum, eins og Kaupmannahafnar, þar sem er mjög dýrt að kaupa og leigja húsnæði í miðborginni. Það er að verða meiri höfuðborgarbragur á þessum svæðum. Það er mjög lítið framboð af íbúðum í miðborginni sem eru undir 90 fermetrum að stærð,“ segir Ingibjörg í fréttaskýringu um mál þessi í Morgunblaðinu í dag.