Júlímánuður hefur verið býsna hagstæður um landið sunnan- og vestanvert. Á Norðaustur- og Austurlandi hefur verið mun svalara og þungbúnara veður, þótt ekki hafi beinlínis verið illviðrasamt þar um slóðir.
Svo segir Trausti Jónsson veðurfræðingur, spurður um veðrið í júlímánuði, sem senn kveður.
Þrátt fyrir góðan hita sunnanlands og vestan hafa mjög hlýir dagar verið fáir og hitabylgjur nær engar, segir Trausti.
Margir hafa eflaust haldið að einhver veðurmet hafi fallið í júlí en svo er ekki. Hann er nú í 5. hlýjasta sæti á þessari öld í Reykjavík en í því 6. hlýjasta síðustu 68 árin.
Á Akureyri er mánuðurinn það sem af er í 38. til 43. sæti á 81 árs listanum þar.
Nánar er fjallað um júlíveðrið í Morgunblaðinu í dag.