Sjálfstæðismaðurinn Albert Guðmundsson og píratinn Katla Hólm Þorhildardóttir tóku sæti á Alþingi í dag. Hvorugt þeirra hafði áður tekið sæti á Alþingi og skrifuðu þau því undir drengskaparheit að stjórnarskránni við upphaf þingfundar í morgun.
Albert tekur sæti Áslaugar Örnu Sigurbjörnsdóttur en hún getur ekki sinnt þingmennsku á næstunni. Albert er fráfarandi formaður Heimdallar, félags ungra sjálfstæðismanna í Reykjavík en hann var í 4. sæti í Reykjavíkurkjördæmi norður fyrir þingkosningar síðasta haust.
Katla Hólm tekur sæti Birgittu Jónsdóttur sem líkt og Áslaug Arna mun ekki geta sinnt þingmennsku á næstunni. Katla Hólm var líkt og Albert í 4. sæti í Reykjavíkurkjördæmi norður fyrir síðustu þingkosningar.