Vorið væntanlegt eftir helgi

Svo virðist sem veturinn ætli að sleppa tökunum á landsmönnum um helgina og að vorsins megi vænta í næstu viku. 16,2 gráður mældust á Höfn í Hornafirði í dag og er því dagurinn í dag með hlýjustu dögum ársins á Suðausturlandi.

Hlýindin sem standa nú yfir verða þó frekar skammvinn að sögn Þorsteins V. Jónssonar, veðurfræðings hjá Veðurstofu Íslands. Á morgun fer að snjóa sums staðar síðdegis, m.a. á fjallvegum, jafnvel á Hellisheiði, Holtavörðuheiði og heiðunum á Vestfjörðum. Spáð er rigningu á láglendi og verður nokkuð vetrarlegt aftur að sögn Þorsteins.

„Hitinn á morgun verður tvískiptur, það verður hlýtt og fínt fyrir austan og fer upp í 12 stiga hita en á vestanverðu landinu nálgast hann 1-3 gráður seinnipartinn. Síðan verður eiginlega bara snjókoma á öllu landinu og það kólnar,“ segir Þorsteinn og bendir á að aðfaranótt föstudags verði slydda og jafnvel snjókoma þar sem ofar dregur.

Hann segir að það verði svolítið vetrarlegt fram á sunnudag en þá fer að hlýna. „Mér sýnist það að vorið verði komið eftir helgi. Þá verður alla vega orðið mun vorlegra með hækkandi hitatölum en sterkum austanáttum.“

• Blogga um frétt