Stefnt er að því að opna safn til heiðurs sænsku hljómsveitinni ABBA í miðborg Stokkhólms árið 2008. Á safninu verður hægt að hlusta á tónlist hljómsveitarinnar, skoða búninga þeirra, lesa sögu ABBA og skoða myndir af frægðardögum hennar á áttunda og níunda áratugnum. Hugmyndasmiðir safnsins, Ewa Wigenheim-Westman og Ulf Westman ákváðu eftir að hafa skoðað Bítlasafnið í Liverpool að þörf væri á að heiðra minningu hljómsveitarinnar sem hætti störfum árið 1982.
Hljómsveitarmeðlimir ABBA, Agnetha Fältskog, Benny Andersson, Björn Ulvaeus og Anni-Frid Lyngstad, hafa öll samþykkt opnun safnsins og mun leggja til muni en að öðru leyti kemur ABBA ekki að stofnun safnsins. Þau eru hins vegar sammála um að hugmyndin sé góð og eigi eftir að vekja athygli.
Þrátt fyrir að hafa hætt störfum fyrir 24 árum er hljómsveitin enn vinsæl og hafa selst 370 milljón eintök af hljómplötum sveitarinnar og einungis Elvis Presley og Bítlarnir geta státað sig af því að hafa selt fleiri hljómplötur.