Zlatan búinn að þagga niður í fólki

Phil Jones, varnarmaður Manchester United, fór fögrum orðum um þá Zlatan Ibrahimovic og José Mourinho fyrir framgöngu þeirra á fyrsta tímabilinu á Englandi.

„Hann hefur verið stórkostlegur. Fólk efaðist þegar hann kom í sumar, um hvort hann gæti staðið sig í ensku úrvalsdeildinni. Hann hefur þaggað niður í því núna,“ sagði Jones við Sky, en ummælin eru varla til þess fallin að stöðva prentvélarnar þar sem Zlatan hefur verið á allra vörum með frammistöðu sinni.

„Hann er frábær persóna í klefanum og á vellinum þar sem hann er martröð varnarmanna. Hann á skilið allt það hrós sem um hann er sagt,“ sagði Jones. Hann hrósaði einnig José Mourinho, sem er að stýra United á sínu fyrsta tímabili.

„Hann gefur öllum aukið sjálfstraust, líka þeim sem hafa ekki verið að spila mikið. Ég sé það á æfingum og í leikjum að við erum að njóta þess að spila fótbolta,“ sagði Jones.

• Blogga um frétt