Spánn mun leika til úrslita á Evrópumóti kvenna í handknattleik en liðið skellti ríkjandi meisturum frá Svartfjallalandi í undanúrslitum í Budapest rétt í þessu 29:28.
Spánn lék afar vel í fyrri hálfleik og hafði yfir að honum loknum 13:8. Í síðari hálfleik tókst Svartfjallalandi að hleypa meiri spennu í leikinn en Spánverjar héldu haus og lönduðu sigrinum eftir spennandi lokamínútur.
Silvia Navarro átti stórleik í marki Spánverja og var valin best hjá Spáni að leiknum loknum. Spánn mætir annað hvort Noregi eða Svíþjóð í úrslitaleiknum en þau eigast við í kvöld.