„Þetta er mjög slæmt. Í fyrsta lagi er það tekjutap sem á sér stað og í öðru lagi er þetta mjög mikilvægur tími á Laugaveginum og það er vont að geta ekki verið með opið,“ segir Jón Arnar Guðbrandsson, sem á Lemon ásamt Jóni Gunnari Geirdal.
Líkt og mbl hefur áður greint frá stendur til að opna nýjan Lemon-stað á Laugavegi 56 en hann var áður á Laugavegi 24. Verkföll lögfræðinga hjá hinu opinbera hafa hins vegar sett strik í reikninginn þar sem starfsleyfi fást ekki afgreidd á meðan.
Veitingastaðurinn Public House á Laugaveginum hefur verið í pattstöðu af sömu sökum en fær hins vegar afgreitt bráðabirgðaleyfi og verður því hægt að opna staðinn mjög fljótlega.
Jón Arnar fór á fund hjá sýslumanni í gær til þess að leita eftir sambærilegu leyfi en það var hins vegar ekki í boði. Ástæðan er sú að veitingastaður með fullgilt leyfi var áður í húsnæði Public House, en svo er ekki farið með nýtt húsnæði Lemon, þar sem fataverslunin Nikita var áður. Ef veitingastaður var áður í rýminu er litið svo á að búið sé að taka húsnæðið út.
Jón Arnar segist þó hafa fengið góðar móttökur hjá sýslumanni þar sem honum var tjáð að embættið myndi reyna að vinna alla undirbúningsvinnu þannig að hægt væri að vinna hratt úr umsóknum þegar verkfallið leysist.
Byggingarfulltrúi á þó eftir að gera lokaúttekt á húsnæðinu og verður það gert þann 4. júní nk. Jón Arnar segir að það sé búið að vera gríðarlegt álag á borgaryfirvöldum og því hafi einnig tekið langan tíma að fá lokaúttektina.
„Við gætum því verið búnir að taka ákvörðun um að opna þann 5. júní ef allt verður með felldu en það er ekki hægt. Maður er bara í gíslingu. Þetta er pattstaða sem slæmt er að vera í,“ segir hann og bætir við að ástandið leiði ekki einungis til tekjutaps, heldur sé erfitt að láta gott starfsfólk bíða í marga mánuði eftir vinnu.
Einnig stendur til að opna nýjan Lemon-stað í Hafnafirði og segir Jón Arnar segir að staðan sé með sama hætti þar á bæ. Staðurinn verður tilbúinn í næstu viku en að öllu óbreyttu verður ekki hægt að opna.
„Þetta er eins með okkur, sjúklingana á spítölunum og svo marga aðra í þessu. Þriðji aðili lendir í tjóninu. Það eru ekki ríki og borg sem finna fyrir þessu með þessum hætti,“ segir Jón Arnar.