Letterman hótað lífláti

Bandaríski spjallþáttastjórnandinn David Letterman, hefur fengið líflátshótanir sem sagðar eru vera frá herskáum samtökum múslíma.

Hótanirnar voru settar fram á vefsíðu, þar sem bandarískir stuðningsmenn samtakanna eru hvattir til að ráða Letterman af dögum vegna gamansögu sem hann sagði um dauða háttsetts al-Qaeda-liða.

Á vefsíðunni eru múslímar búsettir í Bandaríkjunum hvattir til að „skera tunguna út úr þessum ómerkilega gyðingi þannig að hann þagni að eilífu“.

Letterman, sem reyndar er ekki gyðingur, hefur ekki viljað tjá sig um hótanirnar.

• Blogga um frétt