Seldu nýfædd börn

Kólumbísk yfirvöld hafa leist upp mansalshring þar sem nýfædd börn gengu kaupum og sölum. Fimm hafa verið handteknir, grunaðir um aðild að málinu og eru læknir og tveir hjúkrunarfræðingar í hópnum.

„Þau eru grunuð um að tilheyra glæpahring sem seldi nýfædd börn og framkvæmdi ólöglegar fóstureyðingar,“ segir í tilkynningu frá lögregluyfirvöldum á svæðinu. 

Rannsókn sem hófst árið 2013 beindist fljótlega að heilsugæslu í bænum Cucuta við landamæri Venesúela. Læknir við heilsugæsluna framkvæmdi fóstureyðingar fyrir 450 þúsund til 600 þúsund pesóa (um 24 þúsund til 32 þúsund íslenskar krónur) á aðgerð.

Aðeins konur sem voru gengnar styttra en fjóra mánuði gátu fengið aðgerðirnar samkvæmt lögreglu. Væru konurnar komnar lengra á leið var þeim ráðlagt að fæða börnin svo hægt væri að selja þau fyrir um fimm milljónir pesóa (tæplega 300 þúsund íslenskar krónur) á barn til para sem ekki gátu getið börn. Mansalshringurinn falsaði fæðingarvottorð og segir lögregla að pörin sem keyptu börnin verði einnig sótt til saka. 

Fóstureyðingar hafa verið löglegar í Kólumbíu frá árinu 2006 en aðeins þegar um ræðir fórnarlömb nauðgunar, lífshættulegt ástand móður eða sérlega alvarlega skerðingu fósturs.

• Blogga um frétt