Stjórnvöld í Mexíkó hvetja nú alla mexíkóska ríkisborgara til að „fara varlega“ í ljósi þess „nýja veruleika“ sem blasi við í Bandaríkjunum, eftir að mexíkóskri konu sem hafði búið ólöglega í Bandaríkjunum um áratugaskeið var vísað úr landi.
Guadalupe Garcia de Rayos var vísað úr landi og send aftur til Mexíkó í gær, degi eftir að hún hafði verið á skrifstofu innflytjendayfirvalda í Phoenix. Rayos hafði starfað og búið í Bandaríkjunum í 22 ár og urðu börn hennar tvö, sem fæddust í Bandaríkjunum, og eiginmaður hennar eftir í landinu.
„Mál frú Garcia de Rayos beinir kastljósinu að þeim nýja veruleika sem mexíkóska samfélagið er að upplifa á bandarískri grundu varðandi hertar aðgerðir í innflytjendamálum,“ sagði í yfirlýsingu frá mexíkóska utanríkisráðuneytinu.
„Af þessum sökum hvetjum við alla Mexíkóa til að fara varlega og vera í sambandi við næsta ræðismann til að geta fengið nauðsynlega aðstoð ef svona aðstæður koma upp.“
Donald Trump Bandaríkjaforseti undirritaði í síðasta mánuði forsetatilskipun um að múr yrði reistur á landamærum Bandaríkjanna og Mexíkó og að aukin áhersla yrði lögð á að vísa ólöglegum innflytjendum úr landi.
Enrique Pena Nieto, forseti Mexíkó, hætti við heimsókn í Hvíta húsið eftir að Trump fullyrti ítrekað að Mexíkó yrði gert að greiða fyrir múrinn.
Pena Nieto hét því einnig að stjórnvöld í landinu myndu veita andvirði 50 milljóna dollara til ræðismanna Mexíkó í Bandaríkjunum til að aðstoða ræðismannsskrifstofurnar við að greiða fyrir lögfræðiaðstoð Mexíkóa sem búsettir eru í Bandaríkjunum.