Skólafélagar 16 ára gamallar indverskrar stúlku, sem hafði verið gift miklu eldri manni af foreldrum sínum, leituðu hana uppi á dögunum og björguðu henni af heimili hans. Stúlkan hefur nú snúið aftur í skóla í Rajasthan héraði á Indlandi þar sem hún stundar námið af kappi.
Það var í maí síðastliðnum sem foreldrar stúlkunnar neyddu hana til að hætta í skóla til að flytja í nálægt þorp þar sem hún átti að búa með eiginmanninum og fjölskyldu hans. Skólafélagar stúlkunnar sættu sig ekki við þennan ráðhag, höfðu uppi á henni og gengu berfættir tugi kílómetra til sækja vinkonu sína.
„Þeim tókst einhvern veginn að finna húsið sem hún bjó í og hittu hana. Hún sagði þeim að hún vildi halda náminu áfram og hefði ekki áhuga á að búa með eiginmanninum og tengdafjölskyldunni,“ sagði Gopal Singh, kennari við skólann, sem hjálpaði unglingunum að sameinast, í samtali við AFP-fréttastofuna.
Lögreglan neitaði að hlusta á unglingana í fyrstu, en þau komust yfir símanúmer hjá háttsettum embættismanni í héraðinu, sem hafði verið hripað á vegg á lögreglustöðinni, og óskuðu eftir aðstoð, sem þau fengu. Stúlkan var fljótlega sótt heim til eiginmannsins og gat snúið aftur í skólann.
Hún hefur nú óskað eftir því að fjölskyldudómstóll í héraðinu ógildi hjónaband hennar.