Erlent | AFP | 5.9.2017 | 12:54 | Uppfært 6.9.2017 6:56

Irma öflugri en Harvey

Fellibylurinn Irma hefur náð fimmta stigi og er þar með orðinn öflugri en fellibylurinn Harvey sem olli miklu tjóni í Texas í síðasta mánuði. AFP

Fellibylurinn Irma, sem mun skella á Leeward-eyjaklasanum, austan við Púertó Ríkó, seint í dag eða á morgun, hefur nú þegar náð fimmta stigi og er flokkaður sem afar hættulegur.

Frétt mbl.is: Búa sig undir komu fellibyljarins Irmu

Til samanburðar má nefna að fellibylurinn Harvey sem olli miklu tjóni í Texas og Louisiana náði styrkleika fjögur.

Fellibyljastofnun Bandaríkjanna, National Hurricane Center (NHC), biðlar nú til stjórnvalda og almennings á hættusvæðinu að hraða öllum undirbúningi áður en Irma lætur til sín taka.

Fellibylurinn er nú staðsettur um 440 km austur af eyjunni Antigua í Karabíska hafinu og hefur mest náð 280 km/klst.

Búist er við að Irma muni fyrst koma að landi við St. Martin og Antigua, sem eru í norðurhluta Leeward-eyjaklasans. Þaðan mun Irma svo halda áfram til Haítí og Flórída.

Hér er hægt að fylgjast með ferðum Irmu.