Innlent | mbl | 5.5.2015 | 17:01

Bjargaði 55 börnum eftir skjálftann

Ishwor Ghimire hélt á börnunum út og passaði upp á að þau væru örugg. Af Facebooksíðu Ishwor Ghimire

Nepalskur unglingsdrengur bjargaði 55 munaðarlausum börnum út af munaðarleysingjahælinu sem hann ólst upp á, eftir að jarðskjálftinn reið yfir í Nepal í síðustu viku.

Samkvæmt frétt Huffington Post hélt hinn 19 ára gamli Ishwor Ghimire ró sinni þegar jörðin tók að hristast, en þá var hann staddur í Nepal Deprived Women and Children Upliftment Center munaðarleysingjahælinu í höfuðborginni Katmandú.

„Allir krakkarnir urðu svo hræddir og byrjuðu að öskra og gráta,“ sagði Ghimire. „Ég sagði öllum að koma sér út úr húsinu.“ Þá hélt hann á nokkrum barnanna út úr húsinu og passaði upp á að þau væru öll örugg.

Öll börnin, sem eru á aldrinum 4-16 ára, lifðu af en húsið er enn ónothæft vegna hættu á því að það hrynji. Ghimire og rekstrarstjóri munaðarleysingjahælisins útbjuggu lítið plasttjald sem tímabundið skjól fyrir börnin í nálægum garði.

Ghimire hefur sagt frá stöðunni á Facebook-síðu sinni en hann segir enn gæta eftirkasta jarðskjálftans. Þá hafi þurft að koma nokkrum barnanna veikum á sjúkrahús, þar sem tjaldið haldi ekki á þeim hita.

„Við erum eiginlega bara á eigin spýtum, því við höfum ekki fengið neina hjálp ennþá,“ sagði hann í samtali við fréttastofu CNN.

Jarðskjálftinn er sá mannskæðasti í landinu í yfir 80 ár, en yfir sex þúsund hafa látist vegna hans.