Verðlaunaður fyrir kynlífslýsingu

Eiríkur Örn Norðdahl fékk fyrstu bókmenntaverðlaun lestrarfélagsins Krumma, en þau voru veitt fyrir mögnuðustu kynlífslýsingu ársins 2006. Af því tilefni veitti Eiríkur Örn rauðu hrafnsfjöðrinni viðtöku á árshátíð Krumma og mun hafa lesið kynlífslýsinguna með tilþrifum.

Að mati dómnefndar verðlaunanna er framganga sögupersónunnar Högna einhver sú allra hetjulegasta í íslenskum bókmenntum hvernig hann „sarð Dísu með styrk górillunnar, fimi kattarins og slægð höggormsins.” Á vissan hátt sé lýsingin afturhvarf í Íslendingasögurnar, þar sem karlmenn þurfi á öllu sína að halda til að verja sæmd sína og á köflum sé beitt ýkjustíl Bósasögu. Um leið verði vart ákveðinnar nostalgíu eftir hreysti karlmannsins, sem nú orðið sé helst að finna á bás skrifstofunnar, „á bakvið eldavélina" eða bryðjandi víagra í svefnherbergjum eftir að ljósin hafa verið slökkt.

Auk Eiríks Arnar voru tilnefndir Guðbergur Bergsson fyrir Hryllilega sögu, Sölvi Björn Sigurðsson fyrir Fljótandi heim, Stefán Máni fyrir Skipið og Ólafur Jóhann Ólafsson fyrir Aldingarðinn.

Lýsing Guðbergs Bergssonar er að mati dómnefndar listilega skrifuð, leikandi og daðurfull, án þess þó nokkurn tíma að fara yfir strikið. Sölvi Björn Sigurðsson fer nýstárlegar leiðir, svo sem í lýsingu á sinni á „saltlausn í lopa eða andnauð”. Lýsing Stefáns Mána er myndræn og falleg og Ólafs Jóhanns Ólafssonar hefðbundin með sígildu myndmáli.

Bloggsíða Krumma

• Blogga um frétt