Erlent | mbl | 22.8.2015 | 21:18

Ekki útilokað að fjársjóðslestin sé til

Margt hefur verið skrifað um karlmennina sem í vikunni tilkynntu borgaryfirvöldum í Walbrzych í Póllandi að þeir hefðu fundið brynvarða járnbrautarlest með fjársjóð innanborðs og farið fram á að fá hlutdeild í honum. Sérfræðingur sem danska Extra bladet ræddi við segir að ekki sé útilokað að þeir séu að segja satt.

Sjá frétt mbl.is: Er fjársjóðslest nasista fundin?

„Nasistarnir rændu og ruppluðu miklum verðmætum, listaverkum og gulli, frá öðrum þjóðum í Evrópu. Einhver verðmæti hafa komist í leitirnar eftir stríðið en alls ekki öll. Það er því möguleiki á því að fjársjóðslestin sé til í raun og veru,“ segir Claus Bundgard Christensen, lektor í sagnfræði og sérfræðingur í síðari heimsstyrjöldinni við háskólann í Roskilde.

„Það er þó líka við hæfi að benda á að slíkar fréttir skjóta upp kollinum reglulega. Oftast reynist það ekki rétt,“ bætir Bundgård Christensen við.

Hann nefnir í samtali við blaðið sem dæmi mál Danans Karsten Ree sem eyddi mörgum milljónum danskra króna í að leita að þýskum kafbát, í von um að finna fjársjóð.

„Nasistarnir rændu sérstaklega miklum verðmætum í Sovétríkjunum og í Póllandi. Þjóðarmorðin á gyðingunum höfðu það í för með sér að þeir komust yfir mikil verðmæti. Það er því ekki hægt að útiloka að saga þessara manna reynist rétt,“ bætir Bundgård Christensen við.