Erlent | mbl | 29.9.2015 | 10:41

Hefja leit að fjársjóðslestinni

Wikipedia

Pólski herinn hefur kallað sprengjusérfræðinga og sérfræðinga í meðferð efnavopna og geislavirkra efna til bæjarins Walbrzych í suðvesturhluta Póllands en talið er að í jarðgöngum í nágrenni bæjarins sé að finna járnbrautarlest frá tímum síðari heimsstyrjaldarinnar. Tveir karlmenn, þeir Andreas Richter and Piotr Koper, tilkynntu í sumar að þeir hefðu fundið lestina en talið er að hún hafi verið falin í göngunum í lok stríðsins af þýskum nasistum.

Fram kemur í frétt breska dagblaðsins Guardian að líklegt sé talið að sprengjum hafi verið komið fyrir við lestina til þess að koma í veg fyrir að óviðkomandi kæmust í hana. Þá er einnig talið hugsanlegt að efnavopn sé að finna í lestinni sem og geislavirk efni. Talið er að sama skapi að finna megi vopn í lestinni og mögulega verðmæta málma. Sögur hafa lengi gengið um að finna megi slíka lest á svæðinu og margar árangurslausar tilraunir verið gerðar til að finna hana.

Haft er eftir Tomasz Smolarz, héraðsstjóra Neðri-Slesíu, að markmiðið sé að tryggja að íbúum á svæðinu stafi engin hætta af því sem hugsanlega sé að finna í jarðgöngunum. Hafist var handa í gær við að tryggja aðstæður á svæðinu með aðstoð sérfræðinganna. Walbrzych var hluti af Þýskalandi fyrir síðari heimsstyrjöldina og hét þá Waldenburg, en er í dag í Póllandi. Nasistar létu grafa fjölmörg göng í fjöllin á svæðinu en ekki er vitað hver tilgangur þess var.

Sagan segir að lest hlaðin dýrum málum hafi verið ekið inn í göngin við lok stríðsins, þegar Þjóðverjar voru á undanhaldi frá herjum Sovétmanna, en aldrei komið aftur út. Engar sannanir hafa þó fundist um að lestin sé raunverulega til. Richter og Koper segjast hafa notað sérstakan radar sem nær í gegnum berg til þess að finna lestina. Þeir hafa gert kröfu um að fá 10% af þeim verðmætum sem kunni að finnast í lestinni í samræmi við pólsk lög.

Fram kemur í fréttinni að yfirvöld séu að rannsaka hvort mennirnir tveir hafi brotið lög með því að nota radarbúnað við leitina án þess að hafa til þess opinbert leyfi.