Fátt bendir til annars en að þjóðsögur um lest fulla af gulli sem nasistar áttu að hafa falið í Póllandi fyrir herjum Sovétmanna árið 1945 séu nokkuð annað en einmitt það. Pólskur ráðherra sagðist í sumar „99% viss“ um að lestin hefði fundist en rannsakendur segjast engin merki hafa fundið um hana.
Lestin átti að hafa fundist neðanjarðar nærri bænum Walbryzch. Aðstoðarlandbúnaðarráðherrann Piotr Zuchowski sagði í sumar að ratsjármælingar hafi nær sannfært hann um að þýsk herlest væri grafin þar. Ríkisstjóri Neðri-Slesíu benti hins vegar fljótlega á að engar frekari vísbendingar hafi fundist um meinta lest þá frekar en í fyrri skipti sem slíku hefur varið haldið fram.
Niðurstöður hóps rannsakenda sem hefur leitað á svæðinu sem kynntar voru í dag renna stoðum undir álit ríkisstjórans. Hvorki hefur fundist tangur né tetur af lestinni, hvað þá gulli eða gimsteinum sem í henni eiga að vera faldir. Þó segja þeir að mögulega geti neðanjarðargöng verið til staðar en nasistar létu stríðsfanga sína grafa fleiri kílómetra ganga á meðan á hernámi þeirra stóð.
Þjóðsagan segir að nasistar hafi fyllt lestina af gulli í borginni Wroclaw í þann mund sem Rauði herinn sótti fram á síðustu dögum heimsstyrjaldarinnar. Fullyrðingar um að lestin hefði fundist fóru aftur í kreik fyrr á þessu ári eftir að tveir menn sögðu yfirvöldum að þeir vissu hvar hún væri niður komin. Þá vitneskju hefðu þeir frá játningu manns sem átti að hafa tekið þátt í að fela lestina á dánarbeði hans.
Frétt breska ríkisútvarpsins BBC