Boris Johnson, utanríkisráðherra Bretlands, bað stjórnvöld í Norður-Kóreu að fara eftir ályktun Sameinuðu þjóðanna og stoppa vinnu við kjarnorkuvopn. Þetta kom fram í tilkynningu frá utanríkisráðuneytinu í dag.
Sagði Johnson þar að nú væri komin upp staða sem hefði komið upp áður, en að Bretar myndu standa með alþjóðlegum vinaþjóðum sínum með það að leiðarljósi að koma Norður-Kóreu í skilning um að þeir þyrftu að fara eftir ályktunum Sameinuðu þjóðanna til að halda frið og stuðla að öryggi í þessum heimshluta.
Norður-Kórea hefur staðið fyrir fimm kjarnorkuvopnatilraunum, en tvær þeirra fóru fram í fyrra. Þá hefur fjölda eldflauga verið skotið á loft í tilraunaskyni. Í einni slíkri fóru flaugarnar nálægt yfirráðasvæði Japans.
Spenna á Kóreuskaganum hefur verið í hámarki undanfarna daga, en í dag fögnuðu Norður-Kóreumenn því að 105 ár eru liðin síðan stofnandi ríkisins, Kim Il-sung, fæddist. Fjölmenn skrúðganga var farin í höfuðborg landsins, Pyongyang, og er mjög rætt um að forseti Norður-Kóreu, Kim Jong-un, fyrirskipi nýjar kjarnorkuvopnatilraunir.
Yfirvöld Norður-Kóreu afhjúpuðu í dag það sem virðist vera langdræg kjarnaflaug (e. ICBM) á risastórri hersýningu í höfuðborg landsins, Pyongyang. Eldflaugarnar og ýmis önnur vopn voru sýnd í röð eftir stærð en það voru fjórar risavaxnar og grænar eldflaugar, sem keyrðar voru á sérhönnuðum vögnum undir lok sýningarinnar, sem vöktu athygli hernaðarsérfræðinga.