Kjarnorkuvopnatilraun Norður-Kóreu í nótt er fimm eða sex sinnum öflugri en sú síðasta en sjötta kjarnorkuvopnatilraun þarlendra stjórnvalda var gerð í nótt. Skjálftinn frá kjarnorkusprengingunni mældist 6,3 stig.
Lee Mi-sun, yfirmaður jarðskjálfta- og eldfjallasviðs Veðurstofu Suður-Kóreu, segir að upptök skjálftans hafi verið í norðurhluta N-Kóreu en þar er helsta eldflaugatilraunasvæði landsins, Punggye-ri.
Fimmta kjarnorkusprengjan var sprengd í september í fyrra og mældist jarðskjálftinn þá 5,3 stig. Fyrsta kjarnorkusprengjutilraun Norður-Kóreu var gerð árið 2006.
Talið er að miðað við stærð skjálftans í september hafi sprengjan verið um 10 kílótonn. Það er tæplega tvöföld stærð síðustu kjarnorkuvopnatilraunar Norður-Kóreu en heldur minni en atómsprengjan sem Bandaríkjamenn létu falla á Hiroshima en sú var 15 kílótonn.
Á Vísindavefnum kemur fram að kílótonn er notað sem mælieining á sprengikraft kjarnasprengju. Eitt kílótonn (kT) jafngildir sprengikrafti 1.000 tonna af hefðbundna sprengiefninu TNT (trinitrotuluen, C7H5O6N3) eða 1012 kaloríum sem jafngildir 4,186 x 1012 J. Eitt kílótonn er sú orka sem losnar við fullkomna klofnun á 56 g af kjarnkleyfu efni. Eitt megatonn (MT) jafngildir sprengikrafti milljón tonna af TNT.
Sprengingin í nótt varð aðeins nokkrum klukkustundum eftir að yfirvöld í Norður-Kóreu greindu frá því að þeim hafi tekist að framleiða vetnissprengju sem hægt væri að koma fyrir á nýrri langdrægri eldflaug sem hægt er að skjóta á milli heimsálfa.
Í tilkynningu sem lesin var upp í ríkisfréttastofu Norður-Kóreu kom fram að þau hafi sprengt vetnissprengju í nótt með fullkomnum árangri og að ekki væri vandamál að koma sprengjunni fyrir í langdrægri eldflaug.
Skjálftinn sem fylgdi kjarnorkuvopnatilrauninni fannst víða í norðausturhluta Kína og skalf jörð í einhverjum borgum í átta sekúndur. Skjálftinn fannst alla leið til Changchun borgar sem er í um það bil 400 km fjarlægð frá tilraunasvæði N-Kóreu, Punggye-ri.
Í borginni Yanji, sem er í 20 km fjarlægð frá landamærum N-Kóreu var skjálftinn svo öflugur að fólk hljóp út af heimilum sínum.