„Ég er mjög ánægður fyrir hönd skjólstæðings míns,“ segir Sigurður G. Guðjónsson, verjandi Sigurjóns Árnasonar, fyrrum bankastjóra Landsbankans, en hann var sýknaður í héraðsdómi Reykjavíkur í morgun af öllum ákærum í máli þar sem hann var ákærður fyrir umboðssvik.
Sigurjón var ákærður ásamt Sigríði Elínu Sigfúsdóttur, framkvæmdastjóra fyrirtækjasviðs bankans fyrir að hafa í störfum sínum fyrir lánanefnd bankans misnotað aðstöðu sína og stefnt fé bankans í verulega hættu með því að fara út fyrir heimildir til veitingar ábyrgða.
Sigríður Elín var einnig sýknuð í héraðsdómi í morgun.
„Þetta kom mér nú ekki á óvart. Ég hafði nú búist við þessu frá því að þetta mál var kynnt sem sakarefni fyrir honum fyrir mörgum árum,“ segir Sigurður sem kallar málið síðasta angann af langri kæru sérstaks saksóknara.
Sigurjón var ekki í héraðsdómi í morgun en að sögn Sigurðar er hann staddur erlendis en hafði fengið fregnir af úrskurðinum.
Ekki náðist í Arnþrúði Þórarinsdóttur, saksóknara í málinu, við vinnslu þessarar fréttar.