Daninn aftur til Eyja

Danski knattspyrnumaðurinn Rasmus Christiansen hefur samið við ÍBV um að leika með liðinu. Gildir samningurinn til loka ársins.

Rasmus, sem er 34 ára gamall miðvörður, hefur leikið hér á landi um langt árabil og hóf feril sinn á Íslandi einmitt hjá ÍBV. Alls urðu tímabilin þrjú í Vestmannaeyjum á árunum 2010 til 2012.

„Við viljum bjóða Rasmus velkominn á nýjan leik til Vestmannaeyja og ríkir mikil ánægja innan félagsins með heimkomu hans en Rasmus á tvö börn með Elísu Viðarsdóttur, sem er ein af bestu knattspyrnukonum Vestmannaeyja fyrr og síðar,“ sagði meðal annars í tilkynningu frá knattspyrnudeild ÍBV.

ÍBV í næstefstu deild

ÍBV leikur í 1. deild á komandi tímabili eftir að hafa fallið úr Bestu deildinni á því síðasta. Rasmus lék síðast með Aftureldingu þegar liðið hafnaði í öðru sæti 1. deildar á síðasta tímabili.

Einnig hefur hann leikið með Val, KR og Fjölni hér á landi. Alls eru leikirnir orðnir 216 í efstu tveimur deildum Íslands og mörkin sjö.

• Blogga um frétt