„Ég hefði auðvitað viljað sjá meiri árangur af þessu ágæta starfi, það er ljóst að það voru skiptar skoðanir um þessar tillögur en hins vegar höfum við ákveðið hér á Íslandi að fara þessa lýðræðislegu leið," segir Vilhjálmur Þ. Vilhjálmsson, formaður Sambands íslenskra sveitarfélaga um niðurstöðu sameiningarkosninganna á laugardag.
Hann bendir á að í Danmörku og Svíþjóð sé sameining ákveðin með lagaboði.
Þrátt fyrir niðurstöður kosninganna býst Vilhjálmur við því að sameining sveitarfélaga muni halda áfram, líkt og gerðist í kjölfar kosninganna 1993.
„Síðan í framhaldinu hófust viðræður milli ákveðinna sveitarfélaga um sameiningu, á þeirra forsendum að sjálfsögðu. Frá 1990 til dagsins í dag og með þessari niðurstöðu sem fékkst í gær [fyrradag] hefur sveitarfélögum fækkað úr 204 í 89, sem verður að teljast allgóður árangur," segir Villhjámur sem gerir ráð fyrir því að viðræður milli sveitarfélaga haldi áfram á næstu árum. Sá árangur sem náðst hafi frá 1990 sýni vel að sameining sveitarfélaga hafi gefist vel. "Ég tel að þessi niðurstaða útiloki ekki að sveitarfélög taki við fleiri verkefnum í framtíðinni."