Ríkissaksóknari hefur gefið út ákæru á hendur tveimur karlmönnum og konu vegna reksturs pókerklúbbs í Skeifunni. Málið tengist umfangsmiklum lögregluaðgerðum og húsleit sem gerð var í pókerklúbbnum í desember 2012. Það verður þingfest í Héraðsdómi Reykjavíkur síðar í þessari viku.

Poker and play hét pókerklúbburinn í Skeifunni sem lögregla lokaði eftir umfangsmiklar aðgerðir og voru forsvarsmenn klúbbsins einnig handteknir og úrskurðaðir í gæsluvarðhald.

Lögregla hafði áður fengið staðfestar upplýsingar um að staðurinn hefði verið opinn flesta daga vikunnar og spilað væri frá kvöldi og langt fram undir næsta morgun. Einnig hafði lögreglu upplýsingar um að töluverðar fjárhæðir hefðu verið í umferð á spilaborðinu hverju sinni. Einn sakborninga upplýsti lögreglu um það í skýrslutökum að allt að 500 manns hafi verið meðlimir í Poker and play áhugamannafélagi, sem rak pókerklúbbinn.

Fundu peninga í frystikistu og loftskammbyssu

Við húsleit fannst á botni frystikistu talsvert magn peningaseðla sem vafðir voru saman, alls 526.500 krónur. Í litlum peningaskáp á skrifstofu fundust 25.000 krónur til viðbótar og loftskammbyssa. 

Þá lagði lögregla hald á tölvur og tölvubúnað, þar á meðal tölvu sem tók upp efni úr eftirlitsmyndavélum sem voru á staðnum, sem og bókhaldsgögn og posa. Lagt var hald á fimm spilaborð ásamt miklu magni af spilastokkum og spilapeningum.

Einnig fannst mjög mikið magn af áfengi í eldhúsi Poker and play eða 48 flöskur af sterku áfengi, 11 flöskur af ætluðu heimabruggi, 294 flöskur og dósir af bjór, 10 flöskur af líkjör, 3 kassar af léttvínskössum og 35 dósir með erlendu fínkorna munntóbaki.

Varðar allt að 6 ára fangelsisrefsingu

Málið var rannsakað af lögreglu með hliðsjón af 181. gr., 183. gr.,184. gr. og 264. gr. almennra hegningarlaga nr. 19/1940, auk laga nr. 85/2007, um veitingastaði, gististaði og skemmtanahald. Þar sem ríkissaksóknara hefur ekki borist staðfesting á að öllum sakborningum hafi verið birt ákæran fæst hins vegar ekki uppgefið fyrir hvaða háttsemi er nákvæmlega ákært né hvaða upptökukröfur saksóknari gerir.

Þegar gæsluvarðhaldskrafa var sett fram í desember 2012 sagði lögregla að rökstuddur grunur væri um að ábyrgðaraðilar staðarins hefðu aflað sér ávinnings með ólögmætum hætti og tækju sér fé út úr rekstrinum. Jafnframt taldi lögregla rökstudda ástæðu til að ætla að á staðnum og í starfseminni hefði farið fram sala áfengis og annarra veitinga.

Til stuðnings kröfunni sagði lögregla að kominn væri fram rökstuddur grunur um að fólkið hefði framið verknað sem varði allt að 6 ára fangelsisrefsingu.

Sambærilegt mál árið 2004

Hæstiréttur dæmdi í sambærilegu máli í desember 2004 en þá hlaut karlmaður sem ákærður var fyrir að hafa staðið fyrir rekstri fjárhættuspils og veðmálastarfsemi í húsnæði sem hann hafði á leigu fjögurra mánaða skilorðsbundið fangelsi og 500 þúsund króna sekt.

Í ákæru kom fram að maðurinn hefði á tímabilinu frá desember 2001 til 28. september 2002 rekið fjárhættuspil („black Jack”, rúllettur og póker) í atvinnuskyni og sér til ávinnings. Auk þess að vera dæmdur til sektargreiðslu og í skilorðsbundið fangelsi voru gerð upptæk til ríkissjóðs fimm spilaborð, spilapeningar, spilastokkar og rúmlega fimm milljónir króna.

Fréttir mbl.is af spilavítinu:

Spila­víti lokað og 8 hand­tekn­ir

Fjórir úrskurðaðir í gæsluvarðhald

Vissu ekki um ólöglega starfsemi

Spilavítisfólkið laust úr haldi

Lagagreinar

• 181. gr. Nú þykir lögreglustjóra ástæða til að ætla, að maður hafi ekki ofan af fyrir sér á löglegan hátt, og er hann þá skyldur að skýra frá, af hverju hann hafi framfærslu sína og færa rök að. Ef hann gerir það ekki, eða hann aflar sér framfærslu með ólöglegu móti, svo sem með sölu á bannvöru, fjárhættuspili …1) þá skal refsa honum með fangelsi allt að 2 árum, enda liggi ekki þyngri refsing við eftir öðrum lögum.
• 183. gr. Sá, sem gerir sér fjárhættuspil eða veðmál að atvinnu eða það að koma öðrum til þátttöku í þeim, skal sæta sektum …1) eða fangelsi allt að 1 ári, ef miklar sakir eru.
• 184. gr. Hver, sem aflar sér tekna beint eða óbeint með því að láta fjárhættuspil eða veðmál fara fram í húsnæði, er hann hefur umráð yfir, skal sæta sektum …1) eða fangelsi allt að 1 ári.
• 264. gr. [Hver sem tekur við, nýtir eða aflar sér eða öðrum ávinnings af broti á lögum þessum eða af refsiverðu broti á öðrum lögum, eða meðal annars umbreytir slíkum ávinningi, flytur hann, sendir, geymir, aðstoðar við afhendingu hans, leynir honum eða upplýsingum um uppruna hans, eðli, staðsetningu eða ráðstöfun ávinnings skal sæta fangelsi allt að 6 árum.

Tengdar fréttir

Pókerklúbbur í Skeifunni

Fangelsisdómar vegna spilavítis staðfestir

• Stór spilasalur og fjöldi myndavéla
• Fangelsisdómar í spilavítismáli
• „Var mjög hræddur“
• 96 vitni í pókerklúbbsmálinu

» Fleiri tengdar fréttir

• Blogga um frétt