Ég held að það sé tímasóun að lýsa skriflega fyrir byrjendum hvernig þú gerir skriðsundsstrokuna. Þegar þú ert komin aðeins áleiðis þá geturðu vel lesið þér til um slíkt, en fyrir byrjendur gæti maður alveg eins skrifað á latínu. Einnig finnst mér byrjendur lengi að ná því þegar ég stend á bakkanum og reyni að útskýra.
Þegar ég er búin að sjá fólk synda í 1-2 skipti er þrennt sem mér finnst flýta mikið fyrir í lærdómsferlinu.
Margir læra betur með því að sjá heldur en að hlusta. Gagnlegt er að taka sundstrokuna upp á video og horfa á. Ekki láta hendur fallast yfir öllu því sem þarf að laga heldur einblíndu á eitt eða í mesta lagi tvö atriði og hrósaðu sjálfum þér fyrir það sem þú gerir vel. Gott er að fá tilsögn sundþjálfara en reyndu líka að spá í strokuna sjálf(ur) og hvað megi betur fara.
Annað sem virkar vel er að horfa á góðan sundmann og reyna að festa strokuna í huganum. Ef ég er að horfa á video með nemanda þá spyr ég gjarnan spurninga sem tengjast þeirra eigin stroku t.d ,,tekurðu eftir því hvernig hann snýr höfðinu eða ,,hvernig finnst þér hann beita höndinni og leiði nemendur þannig í gegnum ferlið. Þetta fær fólk til að skilja betur einstaka hluta strokunar og muna þegar það sjálft fer í laugina.
Þú getur gert þetta heima með því að nota t.d. YouTube t.d með því að slá inn front crawl technique . Passaðu þig að skoða bara eitt í einu eða bara það atriði sem þú villt bæta hverju sinni. En lykilatriði í sundinu finnst mér að bæta bara eitt atriði í einu og negla vel það áður en vaðið er í það næsta.
Ef allt þrýtur og mér finnst viðkomandi endurtekið gera vitlausar hreyfingar þá hjálpar að leggja viðkomandi á bekk og sýna þeim sundhreyfinguna með því að færa til á þeim handlegginn, höfuðið eða fótleggina. Þannig að þegar þú ert komin uppá bekk þá veistu að þú ert í tómu bulli :-)
Meðfylgjandi er mynd og linkur á vidoe af Gran Hackett ólympíumeistara í 1500 metra skriðsundi árin 2000 og 2004.
http://www.youtube.com/watch?v=f6qIhkuzTx0
Talið er því miður á frönsku en myndatakan er frábær og sýnir tæknina vel.